TEYMIÐ OKKAR

Elma hefur sótt fjölmörg námskeið í söng, leiklist og dansi hérlendis og erlendis, m.a. stundað sviðslistanám í New York og Barcelona. Hún er meðal annars viðurkenndur acrobatic kennari frá Acrobatic Arts. Elma hefur komið fram í fjölmörgum sýningum í gegnum árin en fyrsta atvinnusýningin sem hún tók þátt í var uppfærsla á We Will Rock You í Háskólabíói haustið 2019. Þaðan lá leiðin til Akureyrar þar sem hún dansaði í Chicago hjá Leikfélagi Akureyrar. Elma var danshöfundur og dansari í Söngvakeppninni 2024 & sá um dans og sviðhreyfingar af Línu Langsokk í Þjóðleikhúsinu. Hún hefur einnig unnið fjölmarga heimsmeistaratitla sem danshöfundur fyrir söngleikja- og dansatriði sín á Dance World Cup, heimsmeistaramótinu í dansi.

​

Netfang: elma@ungleikhusid.is

Diljá útstkrifaðist úr Complete Vocal Institute árið 2020 og hefur síðan þá starfað sem söngkona í ýmsum verkefnum. Hún hefur verið í gospelkór frá grunnskólaaldri, hefur sungið og samið tónlist fyrir sjálfa sig og hljómsveitir sem hún hefur verið í en árið 2024-2025 var hún hluti af Stuðlabandinu. Árið 2023 sigraði hún Söngvakeppnina með laginu 
Power og tók þátt fyrir Íslands hönd í Eurovision.

Sigga Ózk er söngkona og leikkona. Hún stundaði nám í Söngskóla Sigurðar Demetz við Söngleikjadeild og kláraði miðprófið þar í tónfræði og söng. Hún er með B.Ed. gráðu frá Kennaraháskóla Íslands og diplómu frá popp-tónlistarskólanum LIMPI í Noregi. 

Hún tók þátt í Söngvakeppni Sjónvarpsins árið 2023 og 2024 og starfar nú sjálfstætt sem tónlistarkona með meiru.

Jenný útskrifaðist með BFA gráðu í leiklist frá AMDA College of the Performing Arts árið 2025 og starfar sem söngkona, leikkona og hlaðvarpsstjórnandi. Hún stundaði klassískt leiklistarnám við AMDA í New York og lauk náminu sínu í Los Angeles, Californiu. Þar lék hún meðal annars í uppsetningum á leikritunum The Adding Machine, Do You Feel Anger?, Of Good Stock, Golden Boy, Clue, og You Got Older. Hún var búsett í LA síðastliðin ár og vann að alls konar verkefnum tengdum sviðslistum og kvikmyndagerð, ásamt handritsskrifum að sínum eigin verkefnum. Hún stundaði einnig klassískt píanónám við Tónlistarskóla Seltjarnarness í 10 ár og lauk miðprófi á píanó árið 2020. Jenný hefur gríðarlegan áhuga á öllu sem tengist sviðslistum og sköpun, og er ótrúlega spennt að vera orðin partur af Ungleikhúsinu.

Hrefna er atvinnuballettdansari sem starfar mestmegnis á Bretlandi ásamt því að kenna á Íslandi. Hún útskrifaðist úr Listdansskóla Íslands árið 2018. Eftir útskrift frá Menntaskólanum Í Reykjavík 2019 tók hún til starfa hjá Ballet Theatre UK frá árunum 2019-2024. Hún hefur einnig starfað með English National Ballet að dansa í Royal Albert Hall bæði í Cinderella og Swan Lake (filmað af BBC). Hrefna vann árið 2025 með Birmingham Royal Ballet þar sem hún dansaði í Cinderella, Les Sylphides og Sleeping Beauty bæði á Bretlandi og í Japan. Hrefna er einnig dansari með Ballet Axis, neóklassískum ballettflokki á Íslandi. Hún var ein danshöfunda fyrir verkið ‘Pointe of Axis’ sem Ballet Axis sýndi og hlaut Grímuverðlaunin fyrir Danshöfundur ársins 2026. Hrefna hefur líka tekið þátt í sjálfstæðum verkefnum og dansað hjá Cork City Ballet, Kings International Ballet og á Maldíveseyjum fyrir m.a. Kanye West. Hefur hún einnig unnið með hljómsveitunum Of Monsters and Men og Sigur Rós við ýmis verkefni. Árið 2023 hlaut hún einnig kennsluréttindi í ‘Progressing Ballet Technique’.

Beth útskrifaðist úr London Studio Centre árið 2018. Beint eftir útskrift fékk hún hlutverk í Matilda the Musical á West End og í kjölfarið kom hún fram í Cats the Musical hjá Royal Caribbean, UK túrnum af Bring it on, Shrek the Musical bæði UK túrnum og í London og Hamilton UK túrnum.

Beth kemur til með að koma inn sem fastur kennari í PPU haustið 2026. Við erum dásamlega heppin að fá hana með okkur inn í Ungleikhúsið!

​Bryndís Björk Guðjónsdóttir hefur æft dans frá tveggja ára aldri hjá ýmsum dansskólum en lengst hjá Danskompaní. Bryndís hefur tekið að sér fjölda verkefna hér á landi en hún dansaði t.d í nokkrum atriðum í Söngvakeppni sjónvarpsins árið 2024 undir stjórn Elmu Rúnar. Einnig hefur Bryndís farið sigurför í keppninni Dance World Cup þar sem hún hefur keppt frá árinu 2021 og unnið sér til fjölda verðlauna. Hún hefur meðal annars unnið sér til sex gullverðlauna, ein silfurverðlaun, ein bronsverðlaun og tvenna Gala verðlauna.
Bryndís hefur verið mjög virk í verkefnum Ungleikhússins en hún hefur tekið þátt í flestum þeirra.
 

Dagbjört hefur verið dansandi síðan áður en hún man eftir sér. Hún æfði dans í 14 ár hjá DansKompaní og kenndi þar fjölmörgum hópum í rúm 6 ár. Dagbjört hefur tekið þátt í Dance World Cup nokkrum sinnum með mjög góðum árangri. Hún tók þátt í uppsetningu á Fyrsta Kossinum hjá Leikfélagi Keflavíkur árin 2021-2022 sem dansari og leikari. Hún hefur auk þess dansað og leikið í nokkrum tónlistarmyndböndum og auglýsingum, og örlítið í sjónvarpi.

Ragna Björk hefur æft dans í mörg ár. Hún æfði lengi dans með áherslu á acrobat. Hún hefur verið partur af PPU frá fyrstu seríu og hefur tekið þátt í ýmsum verkefnum með Ungleikhúsinu auk annara verkefna. Ragna hefur tekið þátt í Dance World Cup þar sem hún hefur unnið til verðlauna. Ragna er nýútskrifuð úr Fjölbrautaskólanum í Garðabæ þar sem hún tók þátt í söngleiknum “Ljóska í Gegn” fyrr á árinu.

Ísabella hefur æft dans og sungið í kór frá sex ára aldri. Hún æfði lengi hjá Dansskóla Birnu Björns og var á listdansbraut JSB í þrjú ár, en tók síðar þátt í Ungleikhúsinu og öllum verkefnum þess. Hún hefur komið fram í fjölda sjónvarpsþátta og á viðburðum, þar á meðal Stundinni okkar, Krakkaskaupinu, Jólastundinni okkar, Gay Pride og í skemmtiatriði á Söngvakeppninni. Til viðbótar hefur hún sótt dansnámskeið erlendis, meðal annars hjá Laine Theatre Arts og Italia Conti í London. Ísabella býr einnig yfir reynslu sem aðstoðardanskennari og hefur starfað við dans- og söngleikjanámskeið fyrir börn.

​Andrea hefur æft dans frá þriggja ára aldri, í DansKompaní til 2024 en þá færði hún sig yfir í Ungleikhúsið. Andrea hefur æft alls kyns dansstíla og er mikill Musical Theater snillingur. Hún hefur tekið þátt í alls kyns spennandi verkefnum og hefur þrátt fyrir ungan aldur mikla sviðsreynslu. Átta ára tók hún þátt í Jólagestum Björgvins á stóra sviðinu í Hörpu. Tíu ára fékk hún hlutverk í Kardemommubænum í Þjóðleikhúsinu. Þrettán ára fékk hún aftur hlutverk í Þjóðleikhúsinu og þá í söngleiknum Frost og núna er hún í sínu þriðja verkefni í Þjóðleikhúsinu þar sem hún leikur í Línu Langsokk. Andrea söng, lék og dansaði einnig í Bestu lögum barnanna 2. Hún hefur þar að auki tekið þátt í mörgum minni sjónvarps- og sviðsverkefnum. Andrea hefur tekið sex sinnum þátt í Dance World Cup með stórkostlegum árangri þar sem hún hefur fengið fjölda verðlauna og þar af 19 heimsmeistaratitla og galatitla.

Andrea hefur tekið virkan þátt í starfi og verkefnum Ungleikhússins og er mikil fyrirmynd yngri nemenda.

Íris Hekla hefur æft dans frá unga aldri. Hún stundaði áhaldafimleika í sjö ár en síðan tók dansinn við. Samhliða fimleikunum æfði hún meðal annars dans hjá DWC og DBB og fór síðan að æfa hjá Plié. Íris hefur verið partur af PPU í Ungleikhúsinu frá upphafi og tekið þátt í ýmsum verkefnum þar, auk fjölda annarra verkefna. Hún hefur einnig tekið þátt í Dance World Cup og unnið þar til verðlauna. Íris var í Árbæjarskóla þar sem hún tók þátt í söngleikjum skólans og Skrekk. Hún er nú að hefja sitt annað ár í Verzlunarskóla Íslands.

Rakel Líf hefur verið að æfa dans síðan hún man eftir sér. Hún hefur meðal annars verið að æfa dans hjá Plié og Listdansskóla Íslands í allskonar dansstílum. Rakel Líf hefur verið partur af Ungleikhúsinu frá upphafi og tekið þátt í ýmsum verkefnum þar, auk fjölda annarra verkefna. Hún hefur einnig tekið þátt nokkrum sinnum í Dance World Cup og unnið þar til verðlauna.

​Júlí Mjöll er útskrifað með BA gráðu í Musical Theatre frá Institution of the Arts Barcelona. Þar tók hán þátt í uppsetningum á söngleikjunum The Prom, We Will Rock You, Into The Woods og Wild Party (LaChiusa version). Hán hefur einnig sótt fjölmörg dans-og sviðslistanámskeið í bæði New York og London. Júlí kenndi í 5 ár hjá Danskompaní, bæði dans og leiklist en hefur einnig kennt á fleiri námskeiðum hérlendis.
 

Aron Gauti Kristinsson Osom er atvinnu sviðslistamaður sem hefur meðal annars verið í sýningunum Frost og Kardemommubænum í Þjóðleikhúsinu. Aron byrjaði að feta sig áfram í leik og söng árið 2015 og byrjaði síðan í dansi og leiklist hjá Danskompaní árið 2016. Síðan þá hefur Aron æft hjá ýmsu fagfólki á Íslandi sem og erlendis og tekið þátt í mörgum verkefnum hér á landi. Hann æfði kvikmyndaleik hjá sviðslistarskólanum Dýnamík í eitt ár og lærði hann mikið þar. Árin 2023 og 2024 tók Aron þátt í Dance World Cup með Team Danskompaní og Team Iceland þar sem hann hefur unnið sér til margra verðlauna. Þar hefur hann unnið fjögur gullverðlaun, tvenn silfurverðlaun og tvenn Gala gullverðlaun. Aron stundar söngleikjanám við Arts Educational í London. Og mun útskrifast þaðan með BA gráðu í Musical Theatre vorið 2027.
Aron hefur unnið náið með Ungleikhúsinu síðustu árin og er mjög spenntur fyrir komandi tímum.
 

Nonni er meistaranemi í sviðslistum við Listaháskóla Íslands þaðan sem hann lauk BA námi í skapandi tónlistarmiðlun árið 2022. Hann er landsliðsmaður í áhaldafimleikum og vinnur sem sirkuslistamaður, með sérhæfingu í handstöðu, loftfimleikum og akróbatík. Fimleika- og tónlistarhæfnin hefur leitt hann um kabarettsenuna í Reykjavík og New York yfir í söngleikjauppfærslur á borð við Gosa, We will Rock You og Við erum hér. Nonni hefur unnið með Hringleik og Sirkus Íslands, Circus Aotearoa á Nýja Sjálandi, Ballet Merveilles de Guinée og BoCirk í Tékklandi, auk þess sem hann hefur sýnt listir sínar á flestum sviðum Íslands í samstarfi við skrautlega hópa listafólks.